Wednesday, August 20, 2008

حريق القاهرة 2008


اليوم 20 اغسطس 2008

بالأمس شب حريق بمقر مجلس الشعب و الشورى بالقاهرة


الصورة من اعلى و يظهر المبنى فى الخلفية و امامى مجمع التحرير و الجامعة الامريكية تقريبا و حريق و دخان شديدين

و لا احد ينقل هذا الخبر سوى الفضائية المصرية و برنامج الكرة مع شوبير فى الحياة


المهم تبادر الى ذهنى الكثير من الأفكار و التى كانت امتع من رؤية التغطية:

1) هل بعد 60 سنة كاملة (نواجه حريق للقاهرة جديد) ؟ ضد الملك و الحركات دى و نكمل مع فردوس عبدالحميد فى مسلسل جديد

2) هل كل حرائقنا ماس كهربائى او جماعة محظورة قامت بالعملية ؟ زى مقر وزارة الثقافة بالصعيد و الاوبرا و هكذا

اظن و الله اعلم ان السبب فى مقلى اللب اللى بداخل مجلس الشعب او ان حد سايب موبايل فى الشاحن و نساه

3) لماذا التعجب من صعوبة التغطية و صعوبة المكافحة ؟ البلد مولعة من غير نار

4) لماذا نشكر الأمن قبل ان تنتهى الحريقة و نبدأ فى حساب الخسائر ؟ و هل هناك شكر على واجب ؟ ولا هى عادة ولا لازمة كلام ؟

5) هل مجلس الشعب و الشورى شىء مهم للشعب و للشورى بينهم ؟

6) الغرف المحترقة (لجنة الزراعة و لجنة الشباب و غرفة اجتماعات صغيرة و مجلس الشورى )

اشعر انه كويس ان لجنة الزراعة اتحرقت بدل ما تبقى موجودة و ما بتعملش حاجة و الناس بيجى لها سرطانات بردوا

و لجنة الشباب اتحرقت و الناس محروق دمها على قناة الاهلى و حقوق الشعب و بكين عبارة عن تغطية فى جريدة الجمهورية

7) لماذا ينقل شوبير خبر مثل هذا ؟ لأنه برنامج عام و لا لأنه عضو مجلس شعب و خايف يصحى الصبح ما يلاقيش مكان يروحه

ولا وطنية زائدة ولا سيط و غنى

8) و كأن مجلس الشعب ما بيهمش حد فى مصر غير المحافظ و مدير الأمن : ممكن لأنهم اللى حيتسألوا عنه بعد كدة

9) ايه المشكلة انه يتحرق ؟ يمكن لقيمته الفنية و التاريخية حيث انه مزار سياحى للشباب من الجنسين و حتى سن 90 او لأنه مقر تجمع احفاد ابو لمعة على مدى تاريخ هذه الجمهورية او المملكة حيث يقال ان قدماء المصريين كانوا بيقعدوا هناك

10) يا ترى الريس حيفتتح مقر مجلس الشعب الجديد فين ولا حيتم الترميم ؟ غالبا المقر الجديد حيكون فى مدينة مبارك الترفيهية

او شرم الشيخ علشان يكونوا تحت ايده

و ممكن فى الساحل الشمالى جنب مقر مصايف النواب

و غالبا لو ترميم يبقى مش حيجتمعوا السنة دى خالص و ممكن يتأخر زى كوبرى بركة سبع بالمنوفية (من 7 الى 15 سنة)

و السنة الجاية يشوفوا لو يتجمعوا فى قهوة فى شارع جامعة الدول

11) لماذا لم يتم الحريق فى وقت اجتماع مجلس شعب ولا شورى ؟ كانت ستضفى جو من الاثارة و الابداع على الموضوع و نخلص من مجلس الشعب اللى اجبرنا على اختيار مديرينه

12) اتخيل ان حريق مجلس الشعب متعة ما بعدها متعة اصل البلد ماشية بيه و لا من غيره فى نفس الاتجاه و السواقين اللى فيه ينطبق عليهم قول الشاعر الشعبى (ما بيعرفش يوقفها - ما بيعرفش يوقفها)

13) المهم بقى اظن ان اهم ما فى الموضوع انى حاشوف تغطية الموضوع فى حدث فى مثل هذا اليوم بعد سنة ولا 2 ان شاء الله
ملحوظة : الصورة بها رمزية شديدة بألوان العلم المصرى
الاحمر سيارة المطافى
الابيض : لون مبنى مجلس الشعب
الاسود : لون السور الحديدى
الاصفر الذهبى : لون النيران بديلا عن النسر ولا الصقر و هو تقريبا حداية

مصر تحترق من زمان ولا يوجد رجال اطفاء
رجال المطافى هجروا

1 Comments:

At 2:10 AM, Blogger هشام علاء said...

عزيزى و حبيبى سولوم

اولا موضوع الحريق ده قمة الكوميديا السوداء بجد لانه بيثبت و بكل وضوح ان البلد من اعلى حاجة فيها من اعلى مؤسسة لااصغر شركة ماشية بالبركة و بدون سايفتى فاكتور يعنى عايشين بال
minmum requirements

و اللى زاد الطين بلة ان ماحدش عارف حاجة

يعنى هديك مثل

اول امبارح كنت قاعد متذنب قدام اختنا منى الشاذلى مستنى طلعتى البهية و كانت مستضيفة خبير قديم كان شغال فى الدفاع المدنى و دلوقتى شغال مستشار سلامة و امن صناعى من منازلهم المهم منى سألته سؤال مهم قالتله ليه المبنى بالاهمية دى مافيهوش نظام انذار حريق و اطفاء ذاتى (عارفه انت نظام الرشاشات اللى فى السقف ده مانت بتاع سلامة و عارف انا اللى هقولك؟) المهم الباشا رد عليها قالها كان موجود بس للاسف كان معطل هههههههه يعنى كان و لا مؤاخذة بايظ

بعد ما اجابها تشاء الظروف ان الوصلة تفصل لمدة دقايق فقلبت فى القنوات كده لقيت فى وشى القناة التانية و لقيت اختنا لميس الحديدى مرات عمرو اديب ما انت عارفها ..المهم معاها العرص الكبير صفوت الشريف و سبحان الله يا اخى سألته نفس السؤال اللى منى الشاذلى سألته عن نظام الانذار المبكر و الاطفاء الذاتى قالها ايه الباشا تفتكر؟ قالها النظام كان موجود و شغال و اشتغل فعلا بس من قوة الحريق فرغ كل المادة اللى فيه و مافيش فايدة برضه

شفت فى حياتك كدب اكتر من كده؟


الحاجة التانية اللى كشف عنها الحريق و انما مستغربلها بصراحة ان الناس مبسوطة..اه و الله العظيم كنت تشوف الناس واقفة تصور بالموبايلات و هما بيضحكوا

انا افهم ان الناس تكون مش زعلانة او على الحياد يعنى الموضوع لا يزعلهم و لا يفرحهم لكن انهم يكونوا شامتانين و مسوطين فده مؤشر خطير جدا ان الناس خلاص ممكن تتبع سياسة الارض المحروقة فى اى لحظة

و ربنا يستر

 

Post a Comment

<< Home